Grjótbarinn golfvöllur í Grindavík

Húsatóftavöllur í Grindavík hefur fengið að finna fyrir óstuði veðurguðanna fyrstu mánuði ársins. Mikið af fjörugrjóti, stóru sem smærra hefur borist inn á golfvöllinn og í fyrstu óveðurslægðinni í janúar var sjór yfir stórum hluta á neðri parti vallarins. Þar eru fimm brautir vallarins. 

Þegar fréttamenn Víkurfrétta litu við nýlega mátti sjá mikið af grjóti sem hafði borist inn á brautir og flatir. Fimmtánda flötin er nokkuð skemmd eftir að nokkur stór grjót hreinlega flugu úr fjörunni inn á flötina. 

Það er ljóst að mikil vinna bíður Golfklúbbs Grindavíkur á næstu vikum að hreinsa grjótið af svæðinu. 

Fjörugrjót yfir stórum hluta 15. brautar. 

Mikið af stóru grjóti við 15. flötina.

Mikill sjór lagðist yfir svæðið í byrjun janúar en var þó ekki í byrjun mars.