Grindvíkingar fá ekki undanþágu ráðuneytis

Umsókn Grindavíkurbæjar um undanþágu frá ákvæðum um lágmarksíbúafjölda á þjónustusvæði um málefni fatlaðs fólks hefði verið synjað. Bæjarstjóri greindi bæjarráði Grindavíkurbæjar frá þessu þar sem tekin var til umfjöllunar tillaga um stefnumótun á þjónustusvæði Suðurnesja um málefni fatlaðs fólks.

Í svari ráðuneytisins kemur fram að til skoðunar er að gera breytingar á ákvæðinu í lögum. Endurmati á yfirfærslu verkefnisins frá ríki til sveitarfélaga hefur verið frestað til loka apríl og því lítur ráðuneytið svo á að samningar milli sveitarfélaga um þjónustusvæði séu enn í gildi.