Grindavík verður lokuð næstu þrjár vikur - óheimilt að dvelja og atvinnustarfsemi bönnuð

Dvöl í Grindavík þykir nú óásættanleg að mati Almannavarnra og hefur verið bönnuð. Öllum hefur verið fyrirskipað að yfirgefa Grindavík fyrir klukkan 19 á mánudag, 15. janúar. Einnig verður öll atvinnustarfsemi þar bönnuð. Gildistími þessarar ákvörðunar er í þrjár vikur.

Þetta kom fram á fundi Almannavarnarnefndar í dag.

Unnið er að því að rannsaka sprungurnar en þessi ákvörðun ætti að auka öryggi og minnka óvissu að sögn Víðis Reynissonar. Í máli Víðis kom fram að mikil hætta sé í kringum sprungurnar og þeim hefur fjölgað. Síðast í dag sáust nýjar sprungur. Aðstæður í Grindvík séu fordæmalausar og hætta á skyndilegri opnun á sprungum í eða við bæinn hafi aukist.

„Okkar markmið núna er að tryggja öryggi Grindvíkinga. Von okkar er þó sú að þeir geti haldið heim með tíð og tíma, vonandi í sumar eða haust,“ sagði Guðrún Hafsteinsdóttir, dómsmálaráðherra. Hún hvatti fólk til þess að kynna sér nýjustu upplýsingar á heimasíðu Almannavarna, almannavarnir.is

Þeir sem dvelja nú í Grindavík eru hvattir til að hringja í síma 1717 og tilkynna brottflutning og nýjan dvalarstað. Í samvinnu við Rauða krossinn eru skammtímaúrræði í undirbúningi fyrir þá sem eru í vandræðum með dvalarstað. Allt verði gert til að útvega Grindvíkingum öruggt húsaskjól til skamms tíma.