Grímur Sæmundsen maður ársins í íslensku atvinnulífi

Grímur Sæmundsen, læknir og forstjóri Bláa Lónsins, er maður ársins 2013 í íslensku atvinnulífi, að mati dómnefndar Frjálsrar verslunar. Viðurkenningin var afhent við hátíðlega athöfn á Hótel Sögu í mánudaginn 30. desember  og afhenti Bjarni Benediktsson, fjármálaráðherra Grími viðurkenninguna. Grímur tileinkar öllu starfsfólki Bláa Lónsins viðurkenninguna.

Í fréttatilkynningu frá Frjálsri verslun kemur fram að Grímur hlýtur þennan heiður fyrir framsækni, nýjungar í ferðaþjónustu, arðbæran rekstur til góðs fyrir íslenskt samfélag, fagmennsku, stórhug og útsjónarsemi sem gert hefur Bláa Lónið að einstæðu fyrirtæki í heiminum.

Grímur hefur af mikilli þrautseigju frá árinu 1992, eða í tuttugu og eitt ár, byggt upp Bláa Lónið sem fyrirtæki – og sem ákjósanlegan og vinsælan stað fyrir ferðamenn. Alls 635 þúsund gestir sóttu Bláa Lónið heim á þessu ári.

Nú fara um 70% erlendra ferðamanna sem koma til landsins í Bláa Lónið.
 Frá árinu 2008 hefur Bláa Lónið fest sig í sessi sem vinsælasti og mest sótti ferðamannastaður Íslands. Það er afrek og á bak við þann árangur er saga mikillar framtakssemi.

Rekstur Bláa Lónsins hefur gengið afar vel á undanförnum árum. Það skilar um 1,3 milljörðum króna í hagnað eftir skatta á þessu ári. Hagnaður árið 2012 var um 900 milljónir eftir skatta. Áætluð velta þessa árs er um 5 milljarðar króna. Eigið fé félagsins var um 1,6 milljarðar króna í lok síðasta árs. Starfsmenn Bláa Lónsins eru 240 talsins.

Bláa Lónið baðar sig í ljóma vinsælda og fjölda alþjóðlegra viðurkenninga. National Geographic hefur valið lónið sem eitt af 25 undrum veraldar.

Eiginkona Gríms er Björg Jónsdóttir. Þau eiga þrjú börn og tvö barnabörn.