Gamlir slökkvibílar á safn

Nýtt slökkviliðsminjasafn opnaði á dögunum í Ramma á Fitjum. Það er félag áhugamanna um sögu slökkviliða á Íslandi sem stendur að baki safninu. Safnið er hins vegar starfrækt undir hatti Byggðasafns Reykjanesbæjar og er í húsnæði byggðasafnsins á Fitjum.

Það eru slökkviliðsmennirnir Sigurður Lárus Fossberg og Ingvar Georg Georgsson sem eiga heiðurinn að safninu sem nú hefur verið sett upp. Hugmyndin varð til þegar Sigurði var falið það verkefni að skrásetja alla ameríska slökkvibíla af árgerðum 1940 til 1980 vegna sögu þessara slökkvibíla á Norðurlöndum. Sú vinna var mikil og eitt leiddi af öðru.

Eftir að Sigurður Lárus ræddi við Ingvar Georg fór hugmyndin á fullt og með stuðningi slökkvistjóranna Jóns Guðlaugssonar hjá Brunavörnum Suðurnesja og Jóns Viðars Matthíassonar hjá Slökkviliði höfuðborgarsvæðisins var hugmyndin mótuð og kynnt fyrir Árna Sigfússyni bæjarstjóra í Reykjanesbæ, þar sem menn höfðu augastað á húsakosti Byggðasafns Reykjanesbæjar í Ramma. Til að gera langa sögu stutta þá tók bæjarstjórinn hugmyndinni vel og hvatti slökkviliðsmennina til að þróa hana áfram.

Hér á landi er til fjöldi slökkvibíla og annarra tækja frá fyrri tíð og er aðeins lítið brot til sýnis á slökkviliðsminjasafninu. Ástand gömlu slökkvibílanna sem til eru í landinu er líka misjafnt. Mikið er til af bílum í góðu ástandi en einnig eru margir ekki sýningarhæfir og eru geymdir við slæmar aðstæður víða um land.

Á sýningunni á Fitjum eru aðeins sýningarhæfir bílar og reynt að hafa bílakostinn fjölbreyttan. Á sýningunni er m.a. fyrsti slökkvibíll Slökkviliðs Keflavíkur, Ford af árgerðinni 1947. Hann var endurbyggður frá grunni en slökkviliðsmaðurinn Davíð Heimisson á mestan heiður af þeirri vinnu. Davíð varði um 1100 klukkustundum í endurbæturnar á bílnum sem í dag er eins og nýr. Hugmyndin er að nota hann við hátíðleg tækifæri en með honum á einnig að varðveita sögu Brunavarna Suðurnesja en þann 15. apríl sl. eru 100 ár frá því fyrsta slökkvilið Keflavíkur var stofnsett.

Slökkviliðsminjasafnið í Ramma á Fitjum verður opið um helgar og þar munu slökkviliðsmenn starfa í sjálfboðavinnu við að fræða gesti. Þá er hugmyndin að stofna hollvinasamtök fyrir safnið og virkja þannig slökkviliðsmenn sem eru komnir á eftirlaun og fá þá m.a. til að setja fróðleik um slökkviliðin og slökkvistörf fyrri ára á það form sem varðveita má til framtíðar.