Gaf tvær milljónir króna til Krabbameinsfélags Suðurnesja
Sigurður Wium Árnason kom færandi hendi til Krabbameinsfélags Suðurnesja í gær. Hann færði félaginu tvær milljónir króna að gjöf til minningar um konu hans Auði Bertu Sveinsdóttur, og son þeirra, Svein Wium Sigurðsson, sem bæði létust úr krabbameini fyrir mörgum árum. Þetta er í annað sinn sem hann gefur Krabbameinsfélagi Suðurnesja svona stóra gjöf. Sigurður hefur einnig gefið stórar gjafir til D-deildar Heilbrigðisstofnunar Suðurnesja í gegnum tíðina.
Það var Hannes Friðriksson, formaður Krabbameinsfélags Suðurnesja, sem tók við gjöfinni. Hannes komst þannig að orði þegar hann þakkaði Sigurði að „Það þarf fólk eins og þig fyrir fólk eins og mig“ og vísaði þar í þekktan texta Rúnars Júlíussonar.
Sigurður Wium er hvunndagshetja með stórt hjarta en Víkurfréttir útnefndu hann Suðurnesjamann ársins 2008 fyrir þá velvild sem hann sýnir samfélagi sínu.
„Sigurður er fulltrúi þess fólks sem finnur hjá sér þörf til að láta gott af sér leiða í samfélaginu. Einmitt núna, í brunarústum græðgisvæðingarinnar, þarf samfélagið hvað mest á einstaklingum eins og Sigurði að halda, fólki sem vill gera samfélagið betra og upphefja ný gildi og nýjan hugsunarhátt þar sem samkennd og náungakærleikur fær meira vægi,“ sagði í umsögn Víkurfrétta þegar Sigurður Wium var valinn maður ársins fyrir áratug síðan.
Gjöfin til Krabbameinsfélags Suðurnesja var til minningar um konu hans Auði Bertu Sveinsdóttur, og son þeirra, Svein Wium Sigurðsson.
