Gætu orðið auknar tafir á flugi til Bandaríkjanna

Bandarísk stjórnvöld hafa boðað breytingar á flugverndarráðstöfunum og munu aðgerðirnar hafa áhrif víða um heim og þar á meðal á Keflavíkurflugvöll. Í breytingunum felast auknar kröfur um flugvernd á þeim flugvelli sem er síðasti viðkomustaður fyrir flug til Bandaríkjanna.

Kröfur um aukið öryggi munu m.a. koma fram í því að kannaður verður betur en áður rafbúnaður sem farþegar hafa meðferðis um borð í flugvélar.

Flugvalla- og flugrekendur hafa þrjár vikur til að bregðast við breyttum aðstæðum og má búast við einhverjum töfum í flugverndarskimun meðan á aðlögun stendur.

Samgöngu- og sveitarstjórnarráðuneytið telur að áhrif þessara breyttu krafna kunna að verða einhver hér á landi, sérstaklega í ljósi þess að tilkynnt er um þær skömmu fyrir háannatíma flugumferðar um Keflavíkurflugvöll. Eru farþegar beðnir um að sýna þessu skilning en Isavia mun reyna að lágmarka tafir eftir fremsta megni.