Fyrsta skóflustunga Hönnu Birnu

„Ég er fyrsta konan til að gegna embætti innanríkisráðherra og þetta er fyrsta skóflustungan mín. Ofan á það geri ég þetta 19. júní, á sjálfan kvennadaginn,“ sagði Hanna Birna Kristjánsdóttir, eftir að hún tók fyrstu skóflustungu að stækkun Flugstöðvar Leifs Eiríkssonar á Keflavíkurflugvelli, í ausandi rigningu.

Reist verður 5000 fermetra viðbygging á þremur hæðum við suðurbyggingu flugstöðvarinnar fyrir ný brottfararhlið sem þjóna munu farþegaakstri til flugvélastæða sem ekki eru tengd flugstöðinni með landgöngubrúm. Með því fæst umtalsverð afkastaukning á háannatíma með lágmarksfjárfestingarkostnaði.

Hópur fólks var saman kominn til að fagna áfanganum sem hafa mun verulega þýðingu fyrir ört vaxandi ferðaþjónustu. Víkurfréttir voru á staðnum og tóku meðfylgjandi myndir.

Hanna Birna mundar gylltu skófluna, sem hún kaus frekar að nota en gröfuna fyrir aftan.

Myndir af nýju viðbyggingunni. Hlutföllin miðað við eldri byggingu sjást vel á þeim:

VF/Olga Björt