Fundu stolna Patroljeppann útlitsbreyttann á Selfossi

Nissan Patrol-bifreiðin sem saknað hefur verið frá 3. nóvember síðastliðnum er komin í leitirnar. Lögreglan á Selfossi fann bifreiðina í nótt og var einn karlmaður handtekinn í kjölfarið. Samkvæmt Þorgrími Óla Sigurðssyni, lögreglufulltrúa á Selfossi, hefur maðurinn játað verknaðinn.

„Þetta mun vera bifreiðin sem stolið var í Lyngmóa í Reykjanesbæ,“ sagði Þorgrímur Óli í samtali við Víkurfréttir í kvöld. „Búið var að setja einhverja slitminni hluti á bílinn og mála neðri hluta bílsins gráan,“ sagði Þorgrímur.

Bifreiðin er á lögreglustöðinni á Selfossi en eigandi bifreiðarinnar fær hana ekki afhenta alveg strax þar sem rannsókn málsins er ekki lokið.

„Ég er mjög sáttur við fundinn, þegar ég fæ bílinn til baka þá ætla ég mér að koma honum í samt lag,“ sagði Jón Bjarnason, eigandi bifreiðarinnar, kátur í bragði.