Fundu 160 kg af hassi í skútunni í Sandgerði
Lögreglan á höfuðborgarsvæðinu mun fara fram á að gæsluvarðhald verði framlengt yfir þremur mönnum sem grunaðir eru um að hafa reynt að smygla 160 kg af hassi til landsins með skútu. Mikil lögregluaðgerð var í Sandgerði í júní þar sem komið var með skútuna að landi
Grímur Grímsson, yfirlögregluþjónn miðlægrar rannsóknardeildar, staðfesti við mbl.is að óskað yrði eftir framlengdu varðhaldi. Varðhald var seinast framlengt þann 2. ágúst um fjórar vikur og rennur út á morgun.
Mennirnir þrír voru handteknir þann 24. júní, tveir þeirra um borð í skútunni fyrir utan Reykjanes og sá þriðji í landi skömmu síðar. Sá elsti er fæddur 1970 og sá yngsti árið 2002. 160 kíló af hassi fundust í skútunni og grunar lögreglu að fíkniefnin hafi verið flutt frá Danmörku og áætlaður áfangastaður hafi verið Grænland, segir í frétt mbl.is.
