FSS og Bláa lónið með veglegan sýningarbás á Ferðasýningunni 2007

Ferðamálasamtök Suðurnesja og Bláa lónið verða sameiginlega með veglegan sýningarbás á Ferðasýningunni 2007 sem fram fer í Fífunni í Kópavogi dagana 20. – 22. apríl næstkomandi, þ.e. um næstu helgi. Þar verða ferðamöguleikar Reykjanesskagans kynntir með vandaðri framsetningu og ferðaþjónustufyrirtæki á Suðurnesjum kynna þjónustu sína. Þetta er í fyrsta skipti sem FSS og Bláa lónið sameinast um sýningarbás á þessari sýningu. Þess er því vænst að básinn muni hafa meira aðdráttarafl en ella, enda verður mikið í hann lagt.

Sýningin verður sú stærsta fram að þessu þar sem sýningarnar Golf 2007 og Sumarið 2007 verða samhliða þessa sömu helgi í Fífunni. Það hefur lengi verið rætt um nauðsyn þess að halda eina stóra og veglega ferðasýningu hér á landi í stað þess að halda fleiri og smærri. Nú er sumsé komið að því.

Hátt í 300 aðilar verða þátttakendur á sýningunni og verður fjölmargt í boði fyrir gesti, s.s. keppnir, leikir, fyrirlestrar og áhugaverðar uppákomur af ýmsu tagi.