Framlög til fræðslumála hækka um 120 milljónir í fjárhagsáætlun

Rekstrarniðurstaða A-hluta hjá Grindavíkurbæ í rekstraráætlun næsta árs breytist um 246,7 milljónir í mínus frá endurskoðaðri áætlun ársins 2009.  Framlög til fræðslu- og uppeldismála verða 120,8 milljónum hærri í í endurskoðaðri áætlun 2009. Skýrist það helst af því að nýr Hópsskóli kemur inn í reksturinn.

Forstöðumenn helstu rekstrareininga bæjarins funduðu með bæjarráði í gær vegna fjárhagsáætlunar næsta árs. Framlögð áætlun byggir á tillögum og óskum frá forstöðumönnum.

„Rekstrarniðurstaða A-hluta er tap að fjárhæð 299,1 milljón króna og er það breyting um 246,7 milljónir frá endurskoðaðri áætlun ársins 2009. Helstu skýringar eru þær að fræðslu- og uppeldismál eru 120,8 milljónum hærri en í endurskoðaðri áætlun 2009. Munar þar mestu um að Hópsskóli er að koma inn í rekstur í fyrsta skipti.
Auk þess er áætlun fjármunatekna fyrir árið 2010 mun lægri en áætlun fyrir árið 2009 gerir ráð fyrir. Breyting er 171,3 milljónir.
Rekstur B-hluta stofnana er nokkuð í samræmi við fyrri ár og er rekstrarniðurstaða í samanteknum reikningsskilum tap að fjárhæð 348,8 milljónir kr. en eins og áður munar þar mestu um taprekstur á Hafnarsjóði," segir í bókun meirihlutans frá fundinum í gær.

Bæjarráð samþykkir að vísa áætluninni til fyrri umræðu í bæjarstjórn.
Í framhaldi af þeim fundi munu fulltrúar allra lista koma saman til vinnufunda um fjárhagsáætlunargerð næsta árs samkvæmt vinnufyrirkomulagi sem bæjarstjóri og fjármálastjóri leggja fyrir.