Framkvæmdir við sjóvarnargarða á Vatnsleysuströnd

Framkvæmdir standa nú yfir við sjóvarnargarða á Vatnsleysuströnd en fræmkvæmdirnar eru á hendi Vegagerðarinnar, sem tók á sínum tíma yfir hlutverki Vita- og hafnarmálastofnunar. Bygging sjóvarnargarða er ákveðin á samgönguáætlun, þar sem m.a. er tekið tillit til tillagna og umsagna sveitarfélaga. Framkvæmdirnar munu kosta um 17 milljónir króna en sveitarfélagið greiðir 15% af kostnaðinum.

Ásgeir Eiríksson, bæjarstjóri Voga, segir að í ár verði framkvæmdir tvær, annars vegar verði unnið að úrbótum á garðinum nærri þéttbýlinu (Norður-Vogar) og hins vegar framhald byggingar nýs varnargarðs við Breiðagerði. „Á þeim slóðum hefur ágangur sjávar verið talsverður undanfarið, og því mikilvægt að verja landið með þessum varnargörðum.“

Framkvæmdirnar við sjóvarnargarðana eru unnar af Óskaverki ehf. Í svari Vegagerðarinnar við fyrirspurn Víkurfrétta segir að ekki verði farið í aðrar framkvæmdir við sjóvarnargarða á Suðurnesjunum á þessu ári.

VF-mynd: Hilmar Bragi