Framburður íslenska skipstjórans talinn trúverðugur

Skerið, sem nóta og flotvörpuveiðiskipið Guðrún Gísladóttir KE steytti á og sökk við í Lófót, var ekki merkt inn á sjókort. Skipstjórinn sagði við sjópróf í Noregi í gær að hann hefði verið í góðri trú um að hann væri að sigla á réttri slóð þegar skip hans strandaði.Sjóprófin voru haldin í bænum Svolvær í Lófót og hófust þau snemma í gærmorgun á því að Sturla Einarsson greindi frá því hvað hefði gerst. Í samtali við fréttamann Útvarps sagðist hann hafa undirbúið siglinguna eftir bestu getu innan norska skerjagarðsins til bæjarins Leknes þar sem landa átti 870 tonnum af síldarflökum. Þetta var í annað sinn á örfáum vikum sem Sturla sigldi skipinu þangað en í þetta sinn var ný leið valin.
 
Sturla sagðist hafa kannað sjókort gaumgæfilega og rætt við hafsögumenn á Lófótsvæðinu áður en hann ákvað leiðina sem farið skyldi. Hann sagðist hafa verið ákveðinn í að fara hvergi um svæði þar sem dýpi undir kili skipsins fullfermdu væri minna en 14 metrar og taldi skipið á slíkri siglingaleið þegar það strandaði. Þá var Guðrún Gísladóttir á um 6 sjómílna ferð.
 
Sturla lagði fram sjókort máli sínu til stuðnings í sjóréttinum í dag og fram kemur í norskum fjölmiðlum að framburður hans hafi verið mjög trúverðugur og að fas hans hefði borið vitni um að þar færi rólyndur og þaulvanur skipstjórnarmaður.