Forsætisráðherra boðar til blaðamannafundar um Magma

Jóhanna Sigurðardóttir forsætisráðherra hefur boðað til blaðamannafundar nú klukkan hálf fimm þar sem hún hyggst ásamt fjármálaráðherra og efnahags- og viðskiptaráðherra gera grein fyrir niðurstöðu fundahalda undanfarna daga þar sem rætt hefur verið um Magma-deiluna.

Ríkisstjórnin hyggst rannsaka kaup Magma á HS Orku samkvæmt heimildum fréttastofu Ríkisútvarpsins. Ríkisstjórnin véfengir lögmæti kaupanna og hyggst ekki staðfesta samninginn að svo stöddu. Þá mun ríkisstjórnin endurskoða lög um auðlindir með það að markmiði að tryggja að orkufyrirtæki sem nýta orkuauðlindir séu að meirihluta í opinberri eigu og takmarka þannig eignarhald einkaaðila á þeim.