Fólksbíll endaði 100 metra uppi í urð og grjóti

Lítil fólksbifreið endaði um 100 metra utan vegar, uppi í urð og grjóti rétt við Grindavíkurafleggjara og stöðvaðist á toppnum eftir að hafa endastungist í öllum látunum. Ökumaðurinn skaust út úr bílnum. Hann var sendur með sjúkrabíl á Landsspítalann í Fossvogi. Ekki liggja fyrir upplýsingar um hversu meiðsli hans eru mikil. Hann er grunaður um akstur undir áhrifum lyfja. Atvikið átti sér stað á sjöunda tímanum í fyrrakvöld.

Það þykir með ólíkindum hvernig bíllinn gat farið alla þessa leið upp urðina og móann en vitni segja bílinn hafa verið á mikilli ferð. Dekkjaför sjást frá Reykjanesbrautinni þar sem bíllinn fór út af og á leiðinni upp urðina losnuðu margir hlutar bílsins sem er gjörónýtur eftir óhappið.

Hér má sjá myndband þar sem sést vel hversu langa leið bíllinn ók inn í hraunið. VF myndir og myndband: Pket.