Flugstöðin rýmd og allir sendir í öryggisleit

Þröngt var á þingi í flugstöð Leifs Eiríkssonar nú rétt í þessu. Samkvæmt heimildum Víkurfrétta er ástæðan sú að, fyrir mistök, hafi farþegar flugvallarins sem þurftu að gangast undir öryggisleit og þeir sem þurftu þess ekki, verið sameinaðir, sem eru stór brot á öryggisreglum flugstöðvarinnar, við komu einnar vélar.

Í kjölfarið þurftu allir farþegar sem á flugvöllinn voru komnir að fara í gegnum öryggisleit, hvort sem þeir voru nú þegar búnir að því eða ekki. Þær flugvélar, sem voru ennþá á flugvallarsvæðinu og með farþega um borð, voru einnig rýmdar.

Þegar Víkurfréttir yfirgáfu flugstöðina var brottfararsvæðið yfirfullt af nokkur hundruð óþolinmóðum og þreyttum farþegum sem biðu svara.