Flugmenn Gæslunnar opnir fyrir hugmyndinni

Benóný Ásgrímsson, yfirflugstjóri Landhelgisgæslunnar, segir að flugmenn hennar séu mjög opnir fyrir þeim hugmyndum að Gæslan flytjist að hluta eða í heild til Suðurnesja. Það geti skapað aukin tækifæri fyrir starfsfólk og aukið umsvif Gæslunnar. Þá segir hann að aðstaðan á Keflavíkurflugvelli sé eftirsóknaverðari en í Reykjavík, fyrir utan veðurfarið en meira rok sé yfirleitt í Keflavík sem hugsanlega gæti hamlað flugi. Hins vegar viti hann ekki annað en að öll aðstaða sé í góðu lagi, s.s. skýli, húsnæði fyrir áhafnir og skrifstofur.
Morgunblaðið greinir frá þessu í morgun þar sem jafnframt haft eftir Benóný að þyrluflugmenn Gæslunnar yrðu að búa á Suðurnesjum til að tryggja sem stystan viðbragstíma. Hann tekur þó fram að þessi mál hafi ekki verið rædd við starfsfólk Gæslunnar en býst þó við að málin skýrist fljótlega.