Flokkun fer vel af stað en matarleifar eyðileggja endurvinnsluefni

Flokkun úrgangs við heimili á Suðurnesjum hefur farið nokkuð vel á stað. Hlutfall endurvinnsluefnis af heildarmagni úrgangs er nú um 26% sem er nokkuð gott svona í byrjun, en meðaltalsreynslan annars staðar er um 30%, segir Jón Norðfjörð, framkvæmdastjóri Kölku sorpeyðingarstöðvar sf., í færslu á fésbókinni.

 

Jón segir að byrjunarvandamálin séu helst þau að aðeins hefur borið á því að fólk setji matarleifar og almennt rusl í grænu tunnuna. Til dæmis hafa sést pizzukassar með pizzuafgöngum og fullum sósudollum. 

 

„Þegar svona gerist þá mengar það út frá sér og eyðileggur hluta af endurvinnsluefninu,“ segir Jón í færslunni. Einnig hafa sést snjósleðar, þríhjól, og minni raftæki. „Svona dót á alls ekki að fara í grænu tunnuna“.

 

Jón hvetur fólk til að vanda sig við flokkunina og fara nákvæmlega eftir leiðbeiningunum sem sendar voru inn á öll heimili.

 

En hvað verður um það sem kemur úr endurvinnslutunnunni? Í samtali við Víkurfréttir sagði Jón Norðfjörð að það efni sé losað úr bílum í Kölku í Helguvík þar sem efninu sé pakkað í gáma sem síðan séu fluttir til móttökustöðvar í Hafnarfirði til frekari úrvinnslu.

 

Þetta á ekki heima í endurvinnslutunnunni.