Fjör á árshátíð Njarðvíkurskóla

Árshátíð Njarðvíkurskóla var haldin föstudaginn 11.mars í Íþróttamiðstöð Njarðvíkur.  Húsið var fullskipað nemendum og áhorfendum eins og sæmir á góðri stundu og var salurinn fallega skreyttur.

Nemendur oddatölubekkja sýndu ýmis skemmtiatriði með miklum tilþrifum og valinkunnur hópur nemenda úr 8.-10.bekk sýndi flott dansatriði. Aðrir nemendur  komu með bakkelsi og gos og bornar voru fram veitingar á sal skólans eftir atriðin í íþróttahúsinu.  Margir tóku saman höndum með að gera árshátíðina sem glæsilegasta og er talið að um 800 manns hafi verið saman komnir á árshátíð Njarðvíkurskóla þennan eftirminnilega dag.

Stjórn skólans færir öllum þeim sem lögðu hönd á plóginn varðandi árshátíðina bestu þakkir fyrir aðstoðina.  Sérstakar þakkir eru færðar starfsfólki íþróttahúss fyrir alla vinnuna og aðstoðina sem þau veittu og foreldrum fyrir góðar undirtektir með veitingar.