Fjölskyldudagur helgaður umhverfinu

Nýverið var fjölskyldudagur í Njarðvíkurskóla. Dagurinn var helgaður umhverfinu og nemendur buðu einhverjum úr fjölskyldu sinni, ömmu og afa eða mömmu og pabba, að koma í heimsókn í skólann frá kl. 10-12.  Gestirnir byrjuðu á því að hlýða á stutta dagskrá á sal þar sem nokkrir nemendur sögðu frá því sem verið er að vinna í umhverfismennt í skólanum.  Að dagskránni lokinni fór hópurinn í kennslustofur og fylgdist með því sem nemendur voru að vinna.
Dagskráin á sal hófst á því að Eyjólfur Auðunsson, nemandi í 3. HR, sagði frá fernuskolun sem nemendur og kennarar eru með í 3. bekk og er þetta annað árið sem þau skola drykkjarfernur og senda í endurvinnslu. Tvær stúlkur úr 7. GG, þær Dagmar Traustadóttir og Dalrós Þórisdóttir, sögðu frá endurvinnslu á pappír sem árgangurinn þeirra er að vinna og var sýnd stuttmynd sem tekin var í tíma hjá þeim. Björn Traustason í 10. KA sagði frá þrifum á skólalóðinni sem nemendur og kennarar sjá um. Farið er út og skólalóðin þrifin einu sinni í viku og fer hver bekkur u.þ.b. tvisvar á vetri í þetta verkefni. Þá kynnti Svavar Skúli Jónsson, nemandi úr 7. GG, niðurstöður úr umhverfiskönnun sem send var heim til foreldra í síðustu viku en það voru nemendur úr 7. bekk sem unnu úr niðurstöðunum.
Þess má geta að Njarðvíkurskóli er núna í Comeniusar verkefni sem er samstarfsverkefni skóla í Evrópu og er þema verkefnisins „Umhverfismenntun“ (Environmental Education) og tengist þema fjölskyldudagsins því verkefni.
Mjög góð mæting var hjá fjölskyldum nemenda og tókst dagurinn einstaklega vel.