Fjöldi lögreglubíla veittu eftirför í Reykjanesbæ

Fjöldi lögreglubíla frá lögreglunni á Suðurnesjum veittu ökumanni í ofsaakstri eftirför um götur Reykjanesbæjar aðfaranótt síðasta föstudags. Eftirförin hófst við Hafnargötu í Keflavík og endaði í Innri Njarðvík en eftirförin fór m.a. í gegnum Ásbrú.

Bjarney Annelsdóttir, yfirlögregluþjónn hjá lögreglunni á Suðurnesjum, staðfesti að flestar lögreglubifreiðar embættisins hafi tekið þátt. Sem betur fer varð ekkert slys en ökumaður var handtekinn og yfirheyrður. Hann var svo látinn laus að lokinni skýrslutöku.