Fjölbreytt dagskrá á Ljósanótt

Undirbúningur fyrir Ljósanótt í Reykjanesbæ stendur nú sem hæst en hún verður haldin dagana 2.-5. september nk. Eins og venjulega stendur mikið til á þessari menningar- og fjölskylduhátíð Reykjanesbæjar og verður mikið kapp lagt á að bærinn sé í hátíðarbúningi þessa helgi.

Lokaframkvæmdir við Hafnargötuna verða vígðar ásamt listaverkum og öðrum framkvæmdum og hefð hefur skapast fyrir því að fjölskyldur í Reykjanesbæ bjóði ættingjum og vinum í heimsókn þessa löngu helgi.

Nokkur mynd er nú komin á dagskrá hátíðarinnar sem verður fjölbreytt að vanda.

Fjölmenningarhátíð
Ljósanótt verður sett fimmtudaginn 2. september með fjölmenningarhátíð. Í Reykjanesbæ eru, eins og annars staðar á Íslandi, margir einstaklingar frá hinum ýmsu þjóðlöndum og er hugmyndin að virkja þá til útihátíðar með stuðningi leik- og grunnskólabarna í Reykjanesbæ, t.d. í skrúðgarðinum í Keflavík.

Hagyrðingakvöld
Um kvöldið er stefnan sett á hagyrðingakvöld í Stapanum og hafa undirbúningsaðilar þegar fengið þjóðkunna hagyrðinga alls staðar að af landinu til að taka þátt. Það er Pétur Blöndal hagyrðingur sem mun hafa veg og vanda af undirbúningi í samstarfi við Ljósanefnd en markið er sett á fjölmennasta hagyrðingakvöld á Íslandi. Ef vel tekst til má reikna með að hagyrðingakvöld gæti orðið fastur liður á Ljósanótt til framtíðar.

Tónlistarhátíð
Á föstudeginum verður tónlist gerð góð skil. Viðræður eru í gangi við ýmsa þekkta listamenn til að taka þátt í tónleikum á föstudagskvöldinu. Þá er stefnt að því að 5 - 10 hljómsveitir leiki á veitinga- og skemmtistöðum í bænum seinna um kvöldið þannig að gestir Ljósanætur geta farið á rölt um bæinn eftir tónleikana og hlustað á fleiri hljómsveitir. Einnig er stefnt að unglingatónleikum í Reykjaneshöll og er undirbúningur þegar hafin.

Flug- og tækjasýning
Á laugardaginn verður boðið upp á flug- og tækjasýningu. Stefnt er að fjölbreyttum atriðum á lofti, láði og legi með listflugi og öðrum uppákomum.  Sýningin verður unnin í samvinnu við flugfélög og Varnarliðið. Hápunktur hátíðarinnar er svo dagskrá á útisviði, lýsing Bergsins og ein glæsilegasta flugeldasýning sem haldin er á landinu.

Kirkjustarfið kynnt
Á sunnudeginum er hugmyndin að virkja kirkjudeildir á svæðinu til góðra hluta þar sem gestum yrði kynnt starf þeirra á víðum grundvelli með samkomum og góðri tónlist.

Ljósalagið fyrr á ferðinni í ár
Ljósalagið verður að sjálfsögðu á sínum stað og er Guðbrandur Einarsson formaður undirbúningsnefndar. Keppnin er fyrr á ferðinni í ár en áður, eða annað kvöld, þannig að Ljósalagið geti betur kynnt hátíðina framundan.
Af vef Reykjanesbæjar