Fjárlaganefnd sýni íbúum Suðurnesja sanngirni

Friðjón Einarsson, formaður bæjarráðs Reykjanesbæjar, hefur sent þingmönnum Suðurkjördæmis bréf þar sem hann hvetur alþingismenn í kjördæminu til að fylkja liði og hvetja fjárlaganefnd til þess að sýna sanngirni við íbúa á Suðurnesjum og efna gefin loforð við gerð fjárlaga 2022.

Bréf Friðjóns er hér að neðan.

Kæru þingmenn.

Þann 19. júní 2019 samþykkti Alþingi þingsályktunartillögu um stöðu sveitarfélaganna á Suðurnesjum. Með þingsályktuninni var ríkisstjórninni falið að skipa starfshóp til að vinna tímasetta aðgerðaáætlun um hvernig efla megi þjónustu ríkisins við íbúa á Suðurnesjum og mæta mikilli fólksfjölgun á svæðinu.

Í framhaldi af undirbúningsvinnu ráðuneytisins skipaði samgöngu- og sveitarstjórnarráðherra, í ágúst 2019, starfshóp til að vinna að framgangi verkefnisins. Starfshópurinn ályktaði m.a.
„Lagt er til að viðkomandi fagráðuneyti skoði og meti nánar fjárframlög til einstakra stofnana á Suðurnesjum við fjárlagagerð 2021 og vinnslu fjármálaáætlunar yfirstandandi árs. Þannig verði strax hægt að greina úrbótatækifæri af hálfu ríkisvaldsins m.a. í formi hærri fjárveitinga sem taki mið af íbúavexti og umfram allt hlutlægu mati á þjónustuþörf“.

ÞVÍ MIÐUR ER EKKI HÆGT AÐ SJÁ AÐ FJÁRLÖG 2022 TAKI TILLIT TIL TILLAGNA STAFSHÓPSINS.

Nú hvet ég alþingismenn í okkar kjördæmi að fylkja liði og hvetja fjárlaganefnd til þess að sýna sanngirni við íbúa á Suðurnesjum og efna gefin loforðvið gerð fjárlaga 2022.

Reykjanesbær 27.12. 2021

Með jólakveðju,

Friðjón Einarsson,
formaður bæjarráðs Reykjanesbæjar.