Farþegar biðu í vélum meðan veðrið gekk yfir

Allar áætlunarflugvélar sem von var á síðdegis í dag til Keflavíkurflugvallar eru lentar nema FI-205 frá Kaupmannhöfn sem snéri við og hélt til Glasgow og þar munu farþegar gista í nótt. Hún er væntanleg aftur til Keflavíkur á morgun.

Vegna vinds var ekki hægt að setja afgreiðslutæki upp að flugvélunum sem lagt var á Háaleitishlaði hjá gömlu flugstöðinni og biðu farþegar um borð þar til veðurmörk gerðu afgreiðslu mögulega. Þá voru flugvélarnar færðar að Flugstöð Leifs Eiríkssonar.