Fá styrk til rannsóknar á nýtingu koltvísýringsútblásturs til smáþörungaræktunar

Bláa Lónið hefur hlotið styrk frá Orkusjóði til rannsókna á nýtingu koltvísýrings frá Orkuveri HS Orku hf.  í Svartsengi til þörungaræktunar. Bláa Lónið mun einnig  gera tilraunir með mismunandi þörungategundir með tilliti til lípíðframleiðslu til hagnýtingar í lífdísel orkugjafa.  Heildarupphæð styrksins nemur 14.000 Evrum á  ári til þriggja ára.

Bláa Lónið er þátttakandi í rannsóknaverkefninu LIPIDO „Optimizing Lipid Prodcution by Planktonic Algae“ eða  Hámörkun lípíðframleiðslu með svifþörungum. Verkefnið er norðurevrópskt samstarfsverkefni styrkt af Norður evrópska orkurannsókna verkefninu, „N-INNER.“ Orkusjóður er aðili að verkefninu.

Markmið áætlunarinnar er að styðja við orkurannsóknir á Norðurlöndum og í Þýskalandi og miðla þekkingu á orkurannsóknasviði á milli þessara landa.

Bláa Lónið hefur stundað ræktun smáþörunga til notkunar í húðvörur Bláa Lónsins frá árinu 1996.  Innan fyrirtækisins hefur skapast verðmæt þekking á þessu sviði.  Ása Brynjólfsdóttir, rannsókna- og þróunarstjóri Bláa Lónsins hf. segir styrkinn mikilvægan og mikla hvatningu fyrir áframhaldandi uppbyggingu fyrirtækisins á sviði smáþörungaræktunar.

Mynd: Ása Brynjólfsdóttir, rannsókna- og þróunarstjóri Bláa Lónsins hf.