F-listi: Vilja Sæborgu undir félagsstarf aldraðra

Bæjarráð Garðs samþykkti á fundi sínum í gær að óska eftir viðræðum við Sóknarnefnd Útskálakirkju um leigu eða kaup á húsnæðinu Sæborgu undir félagsstarf fyrir aldraða. Tillaga um slíkt kom frá fulltrúum F-lista, sem hafa meirihluta í bæjarstjórn.

Fulltrúar F-listans telja að nauðsynlegt sé að hefja undirbúning að því að bæta aðstöðu fyrir aldraða í Garði enn frekar frá því sem nú er. Búið er að samþykkja að taka upp viðræður við Búmenn um að byggja upp þjónustukjarna, þjónustu og öryggisíbúðir fyrir aldraða í nágrenni Garðvangs, en einnig er nauðsynlegt að finna lausn til að bæta aðstöðu fyrir félagsstarf aldraðara fram að þeim tíma. Einnig þarf að huga að því að auka fjölbreytni í félagsstarfinu.

Af þeirri ástæðu hafa fulltrúar meirihlutans skoðað málin að undanförnu og telja húsnæði Sæborgar henta mjög vel til að hýsa aðstöðuna fyrir félagsstarfið.