Ert þú aflögufær með matvæli og fatnað fyrir Mæðrastyrksnefnd?

Nokkrir áhugasamir iðnaðarmenn í Grindavík hafa tekið sig saman og safna matvælum og fatnaði fyrir Mæðrastyrksnefnd. Tekið verður á móti matvælum og fatnaði að Staðarsundi 7 (í húsi TG Raf) fyrir Mæðrastyrksnefnd, í kvöld mánudagskvöldið 8. nóvember kl. 20:00-22:00. Frá þessu er greint á vef Grindavíkurbæjar.

Ef þú ert aflögufær að gefa smáræði af mat eins og dósamat, pakkavöru eða átt möguleika að fara í búð og versla fyrir 500 til 1000 kr. og gefa Mæðrastyrksnefnd, þá gerir þú góðverk.

Eins ef þú átt fatnað sem þú ert hætt/ur að nota þá er það vel þegið.

Einnig taka þeir á móti frosnum matvælum og grunar þá að við Grindvíkingar eigi fisk í frystinum sem hægt er að gefa. Iðnaðarmennirnir sjá sjálfir um að taka við matavælum og fatnaði og keyra að kostnaðarlausu til Mæðrastyrksnefndar þriðjudaginn 9. nóvember og fer þetta í úthlutun miðvikudaginn 10. nóvember.