Engin raðhús — bara einbýli

Skipulags- og bygginganefnd Sveitarfélagsins Garðs hefur hafnað umsókn Grétars Þórs Hafþórssonar sem óskaði eftir því að fá að byggja þrjár raðhúsalegjur við Brimklöpp í Klappahverfi í Garði.

Erindinu er hafnað þar sem umsóknin samræmist ekki gildandi deiliskipulagi enda eru Brimklöpp 10, 12 og 14 einbýlishúsalóðir. Umsækjanda var bent á að endurskoðun Klappa- og Teigahverfis stendur yfir og mun auglýsing um lóðarúthlutanir í hverfinu verða auglýstar þegar deiliskipulagsvinnu lýkur.

Þó svo deiliskipulagið geri ráð fyrir einbýli, þá má það heldur ekki vera of hátt. Særún Rósa Ástþórsdóttir óskaði eftir lóð undir byggingu einbýlishúss á tveimur hæðum (hæð ris). Erindinu var hafnað enda samræmist umsóknin ekki gildandi deiliskipulagi þar sem sótt er um hús á tveimur hæðum. Endurskoðun hverfisins stendur yfir og var umsækjanda bent á að fylgjast með auglýsingum um málið.