Engin fjölskylduskemmtun í ár

Björgunarsveitin Suðurnes mun ekki halda álega fjölskylduskemmtun sína í ár þegar flugeldamarkaður björgunarsveitarinnar verður opnaður. Of dýrt er að halda skemmtunina og björgunarsveitin hefur ekki fjármuni til þess að þessu sinni.

 

Kostnaðurinn við fjölskylduskemmtunina hleypur á hundruðum þúsunda. Árið hefur verið kostnaðarsamt fyrir Björgunarsveitina Suðurnes. Útköll hafa verið mörg og tímafrek og þar er mikil kostnaðaraukning. Þá fara meiri fjármunir í menntun björgunarfólks.

 

Þenslan í þjóðfélaginu skilar sér ekki til björgunarsveitanna, sagði björgunarsveitarmaður í samtali við Víkurfréttir og bendir á að verkefnum björgunarsveitanna fjölgi ár frá ári og dýrara sé að reka sveitirnar.

 

Flugeldamarkaður Björgunarsveitarinnar Suðurnes opnar á morgun, fimmtudag. Sölustaður er í húsi björgunarsveitarinnar við Holtsgötu.