Eldur kom upp í orkuveri í Svartsengi
Eldur kviknaði í vélarbúnaði í Orkuveri 3 hjá HS Orku í Svartsengi seinnipartinn í dag. Orkuverið var mannlaust þegar eldurinn braust út og var fólki engin hætta búin.
Starfsmenn HS Orku brugðust skjótt við, lokuðu svæðið af og kölluðu til slökkviliðið í Grindavík sem réði niðurlögum eldsins á skömmum tíma. Eldurinn var ekki mikill og einangraður og því lítil hætta á því að hann myndi breiðast út.
Ekki er vitað með fullri vissu hver upptök eldsins eru að svo stöddu en talið er að lega hafi brotnað í vélinni sem leiddi til þess að það kviknaði í. Starfsmenn HS Orku munu í framhaldinu fara yfir málið. Viðbrögð starfsmanna HS Orku virðast hafa verið hárrétt og komu í veg fyrir að meira tjón hlytist af, segir í fréttatilkynningu frá HS Orku.
Ekki er gert ráð fyrir því að þetta muni hafa áhrif á framleiðslu HS Orku á raforku eða heitu og köldu vatni að öðru leyti en því að framleiðsla vélar í Orkuveri 3 mun stöðvast um tíma á meðan unnið er að úrbótum.
Athafnasvæði HS Orku í Svartsengi samanstendur af sex orkuverum sem framleiða raforku og heitt vatn. Þau hafa verið byggð upp frá árinu 1977 og fram til 2008 þegar nýjasta orkuverið var tekið í notkun. Orkuver 3, þar sem eldurinn kom upp, var gangsett í lok árs 1980. Í orkuverinu er mótþrýstigufuhverfill með uppsett afl uppá 6 MW.
