Eldur í slippnum í Njarðvík

Eldur logar í skuttogaranum Haraldi Böðvarssyni sem stendur í bátaskýlinu við Skipasmíðastöðina í Njarðvík. Slökkvistarf stendur nú yfir. Slökkviliðið í Keflavík er á staðnum og slökkviliðið á Keflavíkurflugvelli hefur einnig verið kallað út.

Silja Dögg Gunnarsdóttir var á vettvangi og tók eftirfarandi myndir.
Þegar eldurinn kveiknaði voru menn við vinnu í bátnum. Þeir komust allir út ómeiddir skömmu seinna. Ekki er enn vitað um upptök eldsins.
Mikinn reyk leggur yfir vinnusvæðið og Njarðvíkurhverfi. Lögreglan hefur lokað vettvangi því í skýlinu eru gaskútar og fleiri eldfim efni, sem hætta stafar af.