Eldgosasvæðið í Meradölum er opið

Eldgosasvæðið í Meradölum er opið. Vinsamlega kynnið ykkur leiðbeiningar á safetravel.is á slóðinni: https://safetravel.is/uncategorized-is/upplysingasida-vegna-eldsumbrota-a-reykjanesi?lang=is

Samkvæmt talningu Ferðamálstofu fóru 4.697 um gossvæðið í gær.

Eftirlit viðbragðsaðila gekk vel í gærkvöldi en það bar helst til tíðinda í nótt að 13 manna hópur villtist af leið A þrátt fyrir að gönguleiðin sé ágætlega vörðuð stikum. Var þeim vísað inn á rétta leið. Sömu sögu er að segja af 5 manna hópi göngumanna.

Bannað er að aka vélknúnum ökutækjum utan vega. Þó er heimilt að aka slíkum tækjum á jöklum og snævi þakinni jörð utan vega utan þéttbýlis svo fremi jörð sé frosin eða snjóþekjan traust og augljóst að ekki sé hætta á náttúruspjöllum. Ólögmætur akstur utan vega varðar refsingu.

Spá veðurvaktar um gasdreifingu

Suðvestan og vestan 5-10 m/s í dag. Gasmengun berst til austurs og gæti orðið vart í Ölfusi.

Mikilvæg skilaboð frá Veðurstofu fyrir þá sem ætla að fara að gosstöðvunum

Gasmengun við gosstöðvarnar getur alltaf farið yfir hættumörk, mengunin leggst undan vindi og því öruggast að horfa til eldgossins með vindinn í bakið.
Í hægviðri (<5 m/s) getur gas safnast fyrir í lægðum, þá stjórnast vindafar af landslagi og gas getur verið yfir hættumörkum langt upp í hlíðar, allan hringinn í kringum gosstöðvarnar. Í slíkum tilfellum þurfa áhorfendur að færa sig upp á fjöll og hryggi en ekki halda sig í brekkunum fyrir ofan.

Foreldrum með börn yngri en 12 ára verður snúið frá leið A af öryggisástæðum að svo stöddu. Áætla má að ferðalagið taki að lágmarki 5 til 6 klukkustundir. Gætt getur gasmengunar á gönguslóð og þá sérstaklega í nálægð við gosið. Börn hafa minna þol gagnvart loftmengun og eru skilgreind sem viðkvæmur hópur. Þá er ekki ráðlegt að börn dvelji lengur en 15 mínútur á stað þar sem loftmengun er yfir heilsuverndarmörkum, sjá upplýsingar á heimasíðu embættis landlæknis.

Börnum yngri en 12 ára er ekki hleypt að gosinu sjálfu og fylgjast viðbragðsaðilar með umferð við upphaf gönguleiðar A að gosinu. Göngumenn fari gætilega og haldi sig fjarri hraunjaðri. Þá er vakin athygli á því að enn er unnið að lagfæringum á þessari leið.

Í framkvæmd veldur þessi regla ekki vandkvæðum en styrkir og styður það frábæra starf sem unnið er af viðbragðsaðilum á svæðinu. Öryggisreglur sæta reglulega endurskoðun.

Foreldrum ungra barna er bent á auðvelda leið inn í Nátthaga þar sem skoða má hraunið sem rann í gosinu í fyrra. Þaðan sést ekki til gossins inn í Meradölum.