Ekið á gangandi vegfaranda

Nokkur umferðaróhöpp urðu í gær á Suðurnesjum og var einn ökumannanna fluttur með sjúkrabifreið á Heilbrigðisstofnun Suðurnesja. Fáein umferðaróhöpp hafa að auki orðið á undanförnum dögum.

Ekið var á gangandi vegfaranda í Keflavík í vikunni með þeim afleiðingum að hann hlaut meiðsl á höfði og fæti. Hann var fluttur með sjúkrabifreið á Landspítala í Fossvogi.

Nokkrir ökumenn hafa verið kærðir fyrir of hraðan akstur það sem af er vikunni. Sá sem hraðast ók mældist á 147 km hraða á Reykjanesbraut þar sem hámarkshraði er 90 km. Hans bíður 210 þúsunda króna sekt.

Fáeinir ökumenn voru teknir úr umferð vegna gruns um fíkniefnaakstur. Þar af óku tveir sviptir ökuréttindum.