Dæmdur fyrir að hóta sýslumanni lífláti

Maður búsettur í Reykjanesbæ var í gær dæmdur sekur um að hafa hótað sýslumanninum á Eskifirði lífláti.

Átti hótunin sér stað um síma kvöld eitt í október sl. en sá ákærði taldi sig eiga ýmislegt sökótt við sýslumann. Hann hafði verið kærður af embætti sýslumanns árið 2005, þegar hann var búsettur á Neskaupsstað og einnig þótti honum lögreglan þar í sveit ekki hafa brugðist við áralöngu áreiti sem hann taldi sig hafa þurft að þola.

Ákærði hafði ekki áður hlotið dóma sem hefðu áhrif á refsiákvörðun og var ölvunarástand mannsins ekki talið geta afsakað gjörðir hans.

Var refsing hans því talin hæfileg 30 daga fangelsi sem er skilorðsbundið til tveggja ára.