Brotist inn og spellvirki unnin í Hópinu

Hún var heldur dapurleg aðkoman hjá unga knattspyrnufólkinu sem mætti á æfingu í Hópinu upp úr klukkan sex í morgun. Brotist hafði verið inn í fjölnota íþróttahúsið Hópið við Austurveg seint í gærkvöldi eða nótt. Talsverðar skemmdir voru unnar. Slökkvitæki í húsinu voru tæmd og meðal annars sprautað inn í tækjarými hússins sem hefði getað haft alvarlegar afleiðingar í för með sér. Greint er frá þessu á heimasíðu Grindavíkurbæjar.

Einnig var sprautað úr slökkvitækjunum yfir grasið, mörkum velt um koll, boltum og ýmsu öðru dóti hent um allt hús og þá var einhverju stolið. Lögregla var kölluð á vettvang og vinnur hún að rannsókn málsins og hefur hún ákveðnar vísbendingar í höndunum.

Þeir sem geta gefið upplýsingar um mannaferðir við Hópið í gærkvöldi eða nótt eru vinsamlegast beðnir að láta lögreglu vita eða hafa samband í Gula húsið í síma 426 8605.

Búið var að draga fram vatnsslönguna sem er til taks ef eldur kemur upp í Hópinu.

Aðkoman var óskemmtileg í morgun í Hópinu.