Brjálað að gera í einu opnu búðinni
Löng biðröð í verslun 10-11 á Nýársdag. „Búðin að tæmast,“ sögðu afgreiðslumennirnir
„Það er búið að vera brjálað að gera síðan klukkan þrjú. Búðin er að verða tóm því við höfum ekki getað fyllt á,“ sögðu ungir afgreiðslumenn í verslun 10-11 í Keflavík en búðin var opin í nótt og í dag, Nýársdag.
Löng röð myndaðist oft í versluninni í dag. Fólk var með margvíslega matvöru í höndunum, allt frá grænum baunum yfir í mjólk og kartöfluflögur. Ungu afgreiðslumennirnir höfðu áhyggjur af vöruskorti á fyrsta degi ársins.
Opið var á einhverjum skyndibitastöðum. Röð var einnig við sölulúgu á Hlöllabátum. Ungu krakkarnir á rúntinum voru svangir og vildu sveittan skyndibita. Gott í þynkunni sagði einhver.
