Bræla og aflaþurrð

Aflabrögð hjá netabátum hafa verið mjög léleg að undanförnu og margir eru þegar búnir að taka upp. Snurvoðabátarnir hafa verið að fá 2-4,5 tonn, að sögn Guðrúnar Gunnarsdóttur vigtarmanns hjá Hafnarsamlagi Suðurnesja.
„Það hafa komið smá toppar hjá snurvoðarbátunum í síðustu viku en fiskiríið hjá þeim er að dragast saman. Þetta er samt allt í lagi ennþá en það hefur oft dregist saman fyrr“, segir Guðrún.
Veðrið hefur verið leiðinlegt undanfarnar vikur, suðvestan átt og bræla. Bátar frá Sandgerði og Grindavík hafa því lagt bátunum í Keflavíkur- og Njarðvíkurhöfn og gert út þaðan þegar veður lægir. Þeir hafa þó ekki haft erindi sem erfiði því aflaþurrðin virðist vera sú sama alls staðar.