Boeing 747 ofan á Keflavíkurmerkinu og Fjölbraut

Ný flugvél frá bandarísku Boeing-verksmiðjunum, Boeing 747-8, var við æfingar Keflavík um síðustu helgi. Haustvindar á Suðurnesjum heilla hönnuði Boeing og þeir fengu þá í góðum skömmtum.

Þóttu æfingar ganga vel og sáu íbúar þetta ferlíki á ferðinni, m.a. áhorfendur á leik Keflavíkur og Þórs í Pepsi-deildinni í knattspyrnu sl. laugardag, eins og sjá má á myndum sem ljósmyndarar VF tóku frá Nettóvellinum, þeir Hilmar Bragi Bárðarson og Páll Orri Pálsson.

Nýja þotan er um 76 metrar að lengd og vænghafið 68,5 metrar. Um er að ræða stærstu farþegaþotu sem Boeing hefur smíðað, hún mun taka 467 manns í sæti en í fyrstu verður aðeins boðið upp á fragtflugs-útgáfu. Öll hönnunin er ný og notuð margvísleg tækni sem einnig er fyrir hendi í Dreamliner-þotunni nýju. Fyrirtækið heitir þvi að þotan noti minna eldsneyti, mengi minna og valdi minni hávaða en aðrar breiðþotur.

Efsta mynd: Hér ber risaþotan við K-fánann á Nettó-vellinum í Keflavík.