Björn Bjarnason um Gæsluna: Flugið til Keflavíkur - skipin í Reykjavík

Björn Bjarnason, dómsmálaráðherra, segir að hann og Halldór Ásgrímsson, forsætisráðherra séu sammála um framtíð Landhelgisgæslunnar, þ.e. að flugstarfsemi Gæslunnar ætti að flytjast til Keflavíkur. Hins vegar sé Gæslan nýflutt í björgunarmiðstöðina Skógarhlíð og hann muni ekki gera tillögu um að það samstarf verði rofið. Morgunblaðið hefur þetta eftir Birni í blaðinu í morgun. Virðast þessi ummæli stangað að nokkru leyti á við það sem forsætisráðherra sagði á fundinum í Stapa í fyrradag.

Aðspurður um hvort aðstaðan í Keflavík væri eftirsóknarverðari en sú sem fyrir hendi er í Reykjavík, segir Björn aðeins að starfsemi Gæslunnar ætti að vera þar sem hún skili bestum árangri en tekur fram að aðstaðan fyrir skip Gæslunnar sé góð í Reykjavíkurhöfn og nýlega hafi þau verið flutt þar á nýjan stað með tilheyrandi kostnaði. Hann segist jafnframt í samtali við MBL ekki hafa séð neinar tillögur um aðra hafnaraðstöðu og viti ekki hvort eitthvað sé í boði í þeim efnum annarsstaðar.
Af þessum orðum Björns má skilja að hann sé sammála því að flugstarfsemin flytjist til Keflavíkur en skipin verði áfram í Reykjavík.

Þetta virðist stangast að nokkru leyti á við það sem Halldór Ásgrímsson sagði á fundinum í Stapa í fyrradag, þar sem hann sagði það ljóst að starfsemi Landhelgisgæslunnar þyrfti að aukast verulega og starfsemin yrði að verulegu leyti, hugsanlega að öllu leyti, á flugvallarsvæðinu. Sagði Halldór, að þetta væri nauðsynlegt vegna þess að aðstæður væru ekki nógu góðar þar sem Landhelgisgæslan væri nú og einnig væri þetta nauðsynlegt vegna öryggis flugvallarins.