Bílvelta og mótorhjólaslys

Nokkuð var um umferðaróhöpp í umdæmi Suðurnesjalögreglunnar í gær. Laust eftir hádegið var tilkynnt um bílveltu á Vatnsleysustrandarvegi, rétt við Reykjanesbrautina. Þar hafði bifreið hafnað á toppnum. Ökumaðurinn var fluttur á HSS til skoðunar en hann er grunaður um ölvun við akstur.

Um miðjan dag var tilkynnt um vélhjólaslys á línuvegi Hitaveitu Suðurnesja að Svartsengi.  Þar hafði ökumaður vélhjóls misst stjórn á hjóli sínu og fallið á veginn.  Hann var fluttur á HSS til skoðunar.  Hann reyndist viðbeinsbrotinn og með blæðingu í fæti.  Ökumaðurinn reyndist ekki hafa réttindi til að aka hjólinu.