Bifreið mæld á 201 km á Reykjanesbraut

Í nótt kl. 02:56 mældu lögreglumenn svarta BMW bifreið á 201 km hraða á Reykjanesbraut við enda tvöföldunarinnar vestan megin en hámarkhraði þar er 90 km.  BMW bifreiðinni var ekið í vesturátt og gáfu lögreglumenn ökumanninum merki, með bláum aðvörunarljósum lögreglubifreiðarinnar, um að stöðva.

Ökumaðurinn sinnti ekki stöðvunarmerkjum lögreglu heldur hélt áfram á ofsahraða.  Lögreglumenn hófu eftirför en hættu henni nokkru síðar þar sem þeir misstu sjónar af bifreiðinni.

Lögreglu bárust nokkrar vísbendingar um bifreiðina og er unnið að rannsókn málsins.