Bærinn kaupir land undir íþróttasvæði

Gengið hefur verið frá samningum um uppbyggingu á íþróttasvæðinu á Nikkelsvæðinu. Reykjanesbær og Húsagerðin ehf munu vinna saman að byggingu svæðisins.

Ríkiskaup seldi Nikkelssvæðið fyrir nokkrum árum og var það Húsagerðin sem bauð hæst í svæðið, kaupverðið var 150 milljónir. Reykjanesbær bauð svo í hluta af landinu, sem hugsað hefur verið sem tenging við Íþróttaakademíuna, fyrir um hálfum mánuði.

Upphaflega tilboðið hljómaði upp á 43 milljónir en Húsagerðin gerði gagntilboð upp á 45 milljónir með tengingu við annað land til að auðvelda frekari uppbyggingu á svæðinu. Þetta var samþykkt einróma á fundi bæjarráðs í morgun.

Árni Sigfússon, bæjarstjóri sagði að æfingarvöllur við Reykjaneshöllina væri fyrsta verkið sem ráðist væri í.

Árni sagði enn fremur það vera ánægjulegt að samningar hafi gengið eftir, aðalskipulagið væri komið í höfn og því ekkert til fyrirstöðu að gera deiliskipulag til að útlista frekari uppbyggingu á svæðinu. En svæðið býður upp á að byggt verði á annað hundrað íbúðir í blandaðri byggð.

Hjólin eru því farin að snúast og Áskell Agnarsson framkvæmdarstjóri Húsagerðarinnar sagði með þessum samningum færi af stað öll sú vinna sem snýr að deiliskipulagi.