ASÍ lýsir þungum áhyggjum af atvinnulífi á Suðurnesjum

Miðstjórn ASÍ sendi núna síðdegis frá sér ályktun þar sem lýst er þungum áhyggjum yfir atvinnulífi á Suðurnesjum. Í ályktunni leggur ASÍ áherslu á að sómasamlega verði staðið að starfslokum þeirra sem missa vinnuna við brottför Varnarliðsins. Annars er ályktunin svohljóðandi:

Miðstjórn Alþýðusambands Íslands lýsir þungum áhyggjum yfir horfum í atvinnulífi á Suðurnesjum, í kjölfar fyrirvaralausrar ákvörðunar bandarískra stjórnvalda um að draga stórlega úr umsvifum í herstöðinni á Miðnesheiði.

Þessi ákvörðun mun hafa mikil áhrif á störf og afkomu um sex hundruð launamanna og fjölskyldna þeirra á Suðurnesjum sem eru í beinni þjónustu hersins auk hundruða annarra vegna neikvæðra margfeldisáhrifa. Miðstjórn leggur áherslu á að sómasamlega verði staðið að starfslokum þeirra sem missa vinnuna og væntir þess að hugað verði sérstaklega að því fólki sem líkur eru á að eigi erfitt með að finna annað starf, til dæmis vegna aldurs. Miðstjórn telur afar mikilvægt að virkar vinnumarkaðsaðgerðir á svæðinu verði efldar, sérstaklega með auknu fjármagni í starfs- og endurmenntun þessa fólks.

Miðstjórn ASÍ krefst þess að íslensk og bandarísk stjórnvöld leggi sitt af mörkum til að draga úr áhrifum þessara breytinga fyrir þetta starfsfólk og samfélagið á Reykjanesi. Í því sambandi verði m.a. horft til þess að nýta búnað og aðstöðu sem til staðar er til nýrrar uppbyggingar atvinnutækifæra á svæðinu, en það er skylda bandarískra stjórnvalda að leggja sitt af mörkum til að skapa því fólki ný störf sem hefur þjónað varnarliðinu, sumt alla sína starfsævi.