Ása Ólafsdóttir opnar sýningu sína í Duushúsum í dag

Ása Ólafsdóttir opnar í dag kl.18:00 sýningu á verkum sínum í sýningarsal Listasafns Reykjanesbæjar í Duushúsum. Um er að ræða verk unnin með fjölbreyttri tækni sem unnin eru á árunum 1991-2004 og kemur fram í fréttatilkynninu að þar gefist kostur á að sjá þróun Ásu í vefnaði, málun, útsaumi, collage og þrívíðum verkum.

Ása er fædd og uppalin í Keflavík en býr nú og starfar í Reykjavík.  Hún útskrifaðist úr Myndlista- og handíðaskóla Íslands árið 1973 og stundaði síðan nám við Konstindustriskolan Göteborgs Universitet árin 1976-1978.

Ása Ólafsdóttir hefur frá árinu 1981 verið virk í myndlistinni og m.a. haldið 20 einkasýningar og tekið þátt í fjölda samsýninga víðs vegar um heim.  Árið 2003 sýndi hún til að mynda með góðum hópi á The Museum of Modern Art í Saitama í Japan.  Hún hefur hlotið ýmsar viðurkenningar og verkefnastyrki og 5 sinnum hlotið starfslaun ríkisins. Hún er félagsmaður í Félagi íslenskra myndlistarmanna og Sambandi íslenskra myndlistarmanna.

 

Í sýningarskrá sem gefin er út af tilefni sýningarinnar segir Sandra Ericson listfræðingur m.a. um Ásu Ólafsdóttur að hún hafi verið einna fyrst listamanna hér á landi til að nýta sér þann skyldleika, sem er á milli skreytingalistar miðalda handrita og útsaums þess tíma, í málun, vefnaði og útsaumi. Sandra klykkir svo út með eftirfarandi orðum: „List nær hæsta takmarki sínu þegar henni tekst að uppgötva fortíðina á ný þannig að hún tali til okkar á algildu máli.  Þessi sýning er vitnisburður slíkrar listsköpunar.“

Sýningin er opin alla daga frá  kl. 13.00 til 17.30 og stendur til 17. október.