Árni Sigfússon: „Sviptingar í borgarstjórn breyta engu fyrir Reykjanesbæ.“

Árni Sigfússon, bæjarstjóri Reykjanesbæjar og stjórnarformaður Hitaveitu Suðurnesja, segir sviptingarnar í borgarstjórn Reykjavíkur ekki munu breyta stöðu Reykjanesbæjar hvað varðar Hitaveituna. „Við verðum að sjá hvað kemur út úr þessum sviptingum, en það breytir ekki grunnstöðu okkar. Við stöndum í báða fætur, eigum okkar 34% og höfum tök á að skoða dæmið og gefa okkur tíma í það.“

Árni bætir því við að með væntanlegri tilkomu REI inn í Hitaveituna myndist forkaupsréttur til handa Reykjanesbæ og öðrum eigendum. 
Þeirra á meðal er Hafnarfjörður, sem hefur ekki enn tekið afstöðu til tilboðs OR í hlut þeirra í HS. Árni segist vona til þess að þau mál fari að skýrast.

„Það væri ágætt að fá einhverja niðurstöðu á það. Það er erfitt að ætla að horfa til framtíðar með einhverri staðfestu ef þú veist ekki hverjir verða með.“

Annars segir Árni að honum sýnist frekar lengra en styttra í að málin leysist. „Ef sameiningin [milli GGE og REI] gengur eftir fær REI stærri hlut en við þurfum að fara algjörlega yfir stöðuna þá. Við teljum okkur annars hafa ágæta samningsstöðu.“