Árekstrar og hraðakstur

Að sögn Karls Hermannssonar hjá lögreglunni í Keflavík var síðasta vika fremur róleg. Nokkuð var þó um árekstra og hraðakstur.Tveir bílar lentu í árekstri á mótum Flugvallavegar og Sunnubrautar sl. fimmtudag. Fjórir aðilar voru fluttir á sjúkrahúsið en meiðsli voru ekki talin vera alvarleg. Bifreiðarnar voru fluttar af staðnum með dráttarbifreið.
Harður árekstur varð á Hringbraut næsta dag á móts við Norðurtún. Ökumaður annarrar bifreiðarinnar var fluttur á Heilbrigðisstofnun Suðurnesja til skoðunar. Áverkar hans voru ekki taldir vera alvarlegir.
Ökumaður ók á ljósastaur við Aðalgötu, framan við Ný-Ung. Ökumaður fékk skurð á höfuðið og bifreiðin var flutt af vettvangi með dráttarbifreið. Einn var tekinn fyrir meinta ölvun við akstur að morgni laugardagsins og 16 aðilar kærðir fyrir hraðakstur.