Almannavarnir skoða varaafl og varavatnsból í Grindavík

HS Orka hefur í samvinnu við HS Veitur hafa kortlagt viðbrögð við náttúruhamförum á Reykjanesi. Þá hefur átt sér stað samtal við Landnet um varnir við loftlínur meðfram Reykjanesbraut vegna hraunrennslis. Þetta kom fram á fundi almannavarnanefndar Grindavíkur á dögunum.

Varaaflsstöðvar við virkjun HS Orku í Svartsengi voru einnig til umræðu á fundinum en fulltrúi HS Orku hefur verið boðaður á næsta fund almannavarna í Grindavik til að fara betur yfir stöðuna varðandi rafmagnsmál, varavatnsból og fleira.

Varaaflstöðvar við byggingar og önnur mannvirki innan Grindavíkur voru einnig til umræðu. Skipuleggja þarf prófun á varaaflsstöð við íþróttamiðstöðina í Grindavík og halda áfram með vinnu við tengingu á varaafli við Víðihlíð. Rætt var um tenginu á varaafli við spennistöð HS veitna við Grindavíkurveg, tengingu við höfnina og varaafli við bensíndælur í sveitarfélaginu.

Rýmingaráætlanir stofnana Grindavíkurbæjar og annarra fyrirtækja í sveitarfélaginu voru til umræðu á fundinum. Fara þarf yfir þær áætlanir sem gerðar hafa verið og uppfæra áætlanir eftir þörfum.

Íbúafundur vegna óvissustigs almannavarna var haldinn í Grindavík í síðustu viku. Nánar er fjallað um fundinn í blaðinu í dag.