Áhugaverður fundur um Hafnargötuna

Undirbúningsfundur fyrir stofnun miðbæjarsamtaka í Reykjanesbæ var haldinn í gærkvöldi. Fundurinn, sem fór fram á Ránni, var vel sóttur og áhugaverður. Árni Sigfússon, bæjarstjóri, kynnti yfirstandandi umhverfisframkvæmdir fyrir fundarmönnum. Lokið verður við endurbyggingu Hafnargötunnar frá DUUS húsum og upp að Faxabraut fyrir ljósanótt á næsta ári en í ár verður lokið við götuna frá DUUS húsum og að Tjarnargötu að gatnamótunum þar meðtöldum.Rúnar Hannah fór fyrir hópi kaupmanna sem eru í undirbúningsnefnd þess sem menn kalla í dag miðbæjarsamtök en félagsskapurinn er í mótun en fram eru komnar hugmyndir um að samtökin verði fyrir verslun og þjónustu frá Fitjum og að Gróf. Á Fitjum hefur verið mikil uppbygging í þjónustu og þar er fyrirhugað að reisa sýningarskála fyrir Íslending en það er vilji bæjaryfirvalda að Hafnargatan og Njarðarbrautin séu hugsaðar sem ein þjónustulína og aðilar í verslun og þjónustu á þessu svæði hafi gott samráð.

Miklar umræður urðu um það hvernig aðilar í verslun og þjónustu myndu taka á málum eins og málningarvinnu og annarri snyrtingu í kjölfar umhverfisátaks bæjarins. Málarar og annað fagfólk, s.s. arkitektar, voru skipaðir í nefnd á fundinum til að vinna að tillögum um samræmt litaval fyrir byggingar við götuna. Einnig voru fundarmenn beðnir um afstöðu til lita á ljósakúplum á nýjum ljósastaurum við götuna.

Fram komu skemmtilegar hugmyndir um að skapa listaverk í götuna með mislitum hellum og vísað til mynda úr bók frá Barcelona á Spáni. Þá var sagt frá hugmynd um bæjarlæk við Hafnargötuna, kastað fram hugmyndum um skúlptúra og samræmdara merkingar á verslanir og þjónustufyrirtæki.

Áhugahópurinn um miðbæjarsamtökin kemur saman á mánudagskvöldum á Ránni kl. 20 og eru allir áhugamenn um málefni Hafnargötunnar og næsta nágrennis velkomnir. Formlegur stofnfundur verður síðan 18. ágúst. Hann verður kynntur nánar síðar.