Ægismenn fagna 75 ára afmæli á laugardag
Björgunarsveitin Ægir í Garði fagnar 75 ára afmæli nk. laugardag, 11. september, með afmælisboði í björgunarstöðinni Þorsteinsbúð við Gerðaveg 20 b í Garði. Afmælisfagnaðurinn hefst kl. 16:00 og er íbúum í Garði boðið til fagnaðarins ásamt velunnurum sveitarinnar.
Á þessum tímamótum verður nýr bátur björgunarsveitarinnar vígður og honum gefið nafn. Einnig verður opnuð ný heimasíða sveitarinnar. Gestum gefst tækifæri til að skoða húsnæði og tækjakost sveitarinnar og kynna sér starfsemina. Boðið verður upp á veitingar í tilefni dagsins.
Nýr bátur Björgunarsveitarinnar Ægis í prufusiglingu á dögunum. VF-mynd: Hilmar Bragi
